मन्दिरमा जिब्रो छेड्नेको घुइँचो

 

सुर्खेतपत्र संवाददाता 

नेपालगन्ज, १८ चैत । 

चैते दसैं अर्थात राम नवमीका दिन शनिवार जिब्रो छेड्दा केही छिनका लागि देवी शक्ति मान्छेको आत्मामा प्रवेश गर्छ भन्ने मान्यताअनुरूप नेपालको विभिन्न मन्दिर र सीमावर्ती मुलुक भारतको मन्दिरहरूमा जिब्रो छेड्नेको घुइँचो लाग्ने गरेको छ । सोही मान्यताअनुसार नेपालगन्जको बागेश्वरी मन्दिरमा धर्मका नाममा आफ्नै जिब्रो तीखो धातुले छेड्ने परम्पराअनुसार यस वर्ष १५० भन्दा बढीले जिब्रो छेडेका छन् । 

राम नवमीका दिन नेपालगन्जमा रहेको बागेश्वरी मन्दिर र भारतको श्रावस्ती जिल्लाको जगपति मन्दिरमा हरेक वर्ष जिब्रो छेड्ने परम्परा नै बनिसकेको छ । जिब्रो छेड्नेहरू हरेक वर्ष आफ्नो घर परिवारको सुख, शान्ति, स्वास्थ्यका साथै धन आर्जन गर्नका लागि पाँच पटकसम्म जिब्रो छेड्ने गर्छन् ।