बल्लतल्ल लडाकू भर्ना सुरु

 

१ सय जनाले फाराम दर्ता गरे 

सुर्खेतपत्र संवाददाता 

सुर्खेत, २२ भदौ ।
    सुर्खेतको दशरथपुरस्थित छैठौं डिभिजनका पूर्व लडाकूहरु उमेर हदका कारण समायोजनमा नपर्ने भएपछि रोकिएको भर्ना प्रक्रिया सहमतिमा शुक्रवार दिउँसोबाट सुरु भएको छ । उमेर हदका कारण अधिकांश लडाकूहरु समायोजनमा नपर्ने भएपछि लडाकूहरुले अवकाश लिने सहमति गरेपछि सेना समायोजनको भर्ना छनौट प्रक्रिया शुक्रवार दिउँसोबाट सुरु भएको हो ।

    उमेर हद नाघेका करिव १ सय जना पूर्व लडाकूहरुले स्वैच्छिक अवकाश लिने निर्णय गरेपछि भर्ना छनोट प्रक्रियामा सहभागी भएको छैठांैं डिभिजनका पूर्व लडाकू अनिल वमले जानकारी दिए । समायोजन रोजेर सेनामा जाने इच्छा गरेका लडाकूहरु उमेर हदका कारण जान नपाएको उनले गुनासो गरेका छन् ।
    सेना समायोजनको भर्ना छनोट प्रक्रियामा शुक्रवार दुई जना महिला लडाकूसहित एक सय जनाले फारम दर्ता गराएको विशेष समितिका सचिवालय सदस्य केशबहादुर शाहीले जानकारी दिए । पूर्व लडाकूहरुले उमेर हदका बारेमा छलफलमा जुटेका कारण भर्ना छनोट प्रक्रिया सुचारु हुन केही ढिलाइ भएको थियो ।
    शुक्रवार साँझसम्म शिविरभित्र ३ सय ९२ जना लडाकू प्रवेश गरेको समितिले जनाएको छ । छैठौं डिभिजनमा समायोजन रोजेका ५ सय ७२ मध्ये १ सय १८ जना प्लाटुन कमाण्डरदेखि डिभिजन कमाण्डरसम्म रहेका छन् ।