जन उच्च माविको वार्षिकोत्सव

 

सुर्खेतपत्र संवाददाता 

सुर्खेत, १० असार ।
    जन उच्च माध्यामिक विद्यालयले आफ्नो ६१ औं वार्षिक उत्सवको अवसर पारेर आइतबार १२ जनालाई सम्मान गरेको छ । विद्यालयका पूर्व प्रधानअध्यापक कृष्णबहादुर रेग्मी, व्यवस्थापन समितिका पूर्व अध्यक्ष मोतिप्रसाद सापकोटा, पूर्व सदस्य जहरसिंह थापा, पूर्व कर्मचारी पदमबहादुर थापालाई सम्मान गरिएको हो । यसैगरी पूर्व शिक्षक घनश्याम ज्ञवाली, पूर्व विद्यार्थी दीपा हमाल, जग्गादाता मानबहादुर खड्का, आदर्श अभिभावक लोकबहादुर र दुर्गा खत्रीलाई पनि यसै अवसरमा सम्मान गरिएको छ । यसैगरी एसएलसीमा विशिष्ट श्रेणी ल्याउने रोहित दाहाल र प्रमिला सुवेदीलाई पनि सम्मान गरिएको छ ।

यसै अवसरमा रामकुमारी थापाले आफ्ना बुवा स्वर्गीय सर्वजीत थापा र आमा इन्द्रादेवीका नाममा ५० हजार १ सय १ रुपैयाँको छात्रवृत्ति घोषणा गरेका छन् । विद्यालयमा पढ्ने एकल महिलाका सन्ततिमध्ये गरीब र जेहेन्दार विद्यार्थीलाई छात्रवृत्ति दिइने बताइएको छ । प्रधानअध्यापक यामबहादुर श्रेष्ठले विद्यालयको आगामी कार्ययोजना सहितको प्रगति प्रतिवेदन प्रस्तुत गरेका थिए । व्यवस्थापन समितिका अध्यक्ष देवकुमार सुवेदीको सभापतित्वमा भएको कार्यक्रममा स्थानीय विकास अधिकारी हिरालाल रेग्मी, क्षेत्रीय शिक्षा निर्देशक नीरा शाक्य, जिल्ला शिक्षा अधिकारी रामप्रसाद उपाध्यायलगायतले भनाइ राखेका थिए ।