कमिसनको खेलले विकास निर्माणका कामहरु गुणस्तरहीन

 

सुर्खेतपत्र संवाददाता 

जाजरकोट, १ साउन ।
    जाजरकोट जिल्लामा बन्ने गरेका विकास निर्माणका अधिकांश कार्यहरु गुणस्तरहीन  हुने गरेको एक कार्यक्रमका सहभागीहरुले गुनासो गरेका छन् । उपभोक्ता समिति, कार्यालय प्रमुख र प्राविधिकको मिलेमतोमा व्यापक अनियमितता हुने गरेका कारण विकास निर्माण गुणस्तरहीन हुने गरेको उनीहरुको आरोप छ । भेरी वातावरणीय विशिष्टता समूह (बी ग्रुप)को आयोजनामा सदरमुकाममा भएको अन्तरक्रिया कार्यक्रमका सहभागीहरुले यस्तो धारणा राखेका हुन् । विकास निर्माण कार्यमा गुणस्तर र पारदर्शीता विषयक सर्वपक्षीय अन्तरक्रिया कार्यक्रममा सहभागी भएका सरोकारवालाहरुले विकास निर्माणका कार्यहरु कागजमै सीमित हुने गरेको आरोप लगाएका छन् ।

स्थानीयस्तरमा गएका प्राविधिकहरुले कमिशनको आधारमा बन्दै नबनेका र गुणस्तरहीन कामलाई पनि पास गरिदिने गर्नुले जिल्लाको विकासको लागि आएको रकम बालुवामा पानी सरह भएको  उनीहरुको भनाइ छ । आफूले भनेको निश्चित कमिसन पाए मापदण्ड विपरित भएका कामहरुलाई समेत प्राविधिकहरुले पास गरिदिने गरेको उद्योग वाणिज्य संघका अध्यक्ष कमान खडकाले बताए । उनले सन्तोष गर्ने कुनै ठाउँ नभएको बताउँदै अधिकांश योजनामा दलका कार्यकर्ता भएका कारणपनि अनियमितता बढ्दै गएको उल्लेख गरे ।