प्रहरीलाई मानव अधिकार तालिम

 

सुर्खेतपत्र संवाददाता 

सुर्खेत, १८ असार ।
    क्षेत्रीय प्रहरी कार्यालय सुर्खेतले सोमवार आफ्ना अधिकृत तहका प्रहरीहरुलाई मानवअधिकार सम्वन्धि अनुशिक्षण तालिम दिएको छ । मध्यपश्चिम क्षेत्रभित्र बिभिन्न जिल्ला र युनिटमा कार्यरत करीव ३० जना अधिकृत तहका प्रहरीहरु तालिममा सहभागी भएका थिए ।

    राष्ट्रिय मानवअधिकार आयोग नेपालगन्जको सहयोगमा भएको कार्यक्रममा आधारभूतरुपमा मानवअधिकारका सवालहरुमा प्रहरी जानकार हुनुपर्नेमा सहभागीहरुको जोड थियो । तालिममा आयोगका क्षेत्रीय प्रमुख मुरारी खरेलले राज्य जहिले पनि कानुन र मानवअधिकारको प्रमुख कार्यन्वयनकर्ता भएका कारण प्रहरीपनि राज्यको एउटा महत्वपूर्ण अंग हुनुका नाताले प्रहरीले मानवअधिकार पालना गर्नुपर्नेमा जोड दिए ।
    कार्यक्रममा पत्रकार महासघं सुर्खेतका अध्यक्ष दुर्गा थापाले राज्य पक्षबाट भएका मानवअधिकारको गम्भीर उलघंनका घटनाहरु मिडियामा आएपनि त्यसलाई सकारात्मक रुपमा लिएर सच्याए उपलव्धी हुने सुझाव दिए । मध्यपश्चिम क्षेत्रीय प्रहरी प्रमुख डिआइजी पार्वती थापाले आफ्ना मातहतका प्रहरीहरुलाई जनताको सेवक भएर खट्दा मानवधिकारका कुरा मा विशेष ध्यान दिन निर्देशन दिइन् ।