५ गाविसका दलित युवा स्वरोजगार

सुर्खेतपत्र संवाददाता 

दैलेख, २५ असोज ।
    पश्चिम दैलेखका पाँच  गाविसका दलित युवा घरमै बसेर व्यापार व्यवसायमा लागेका छन् । गरिवीका कारण पैसा कमाउन भारत पुगेका युवा घर फर्किदा एचआईभी संक्रमित भएर फर्किने क्रम बढ्दै गएकाले उनीहरुले गाउँमै वसेर व्यापार गर्न थालेका हुन् ।
    ती युवालाई व्यापार व्यवसाय गर्न गरिवी निवारण कोषको आर्थिक सहयोगमा सामाजिक सेवा केन्द्र सोसेक सामुदायिक संस्था मार्फत २०/२० हजार ऋण लगानी गरेको छ । राकमकर्णाली, सिगौंडी, सिंहासैन, तिलेपाटा र पिपलकोटका दलित युवा अहिले घरमै वसेर व्यापार व्यवसायमा लागेका छन्  ।

    गरिवी निवारण कोषको आर्थिक सहयोग र सामाजिक सेवा केन्द्र सोसेकको सहयोगमा ती गाविसमा आयआर्जन क्रियाकलाप संचालन गर्न सामुदायिक संस्थामा गरिवी निवारण कार्यक्रमले ऋण लगानी गरेको छ । २०६४ सालमा सो गाविसमा गरिवी निवारण कार्यक्रम लागू भएको थियो । मेहलेगाउँ सामुदायिक संस्थाबाट २० हजार ऋण लिइ कर्णाली राजमार्गको वाख्रेकोटमा व्यवसाय संचालन गरेका सिंहासैन –४ का दलित युवा डिलबहादुर विक वार्षिक ५० हजार आम्दानी गरेको बताए ।
    साहुमहार्जनका छोराछोरीले सुर्खेत, दैलेख र नेपालगन्ज पढेको देख्दा कहिले छोरा छोरीलाई त्यस्तो ठाउँमा पढ्न पठाउने उनको चाहना पुरा भएको उनी बताउँछन् । ‘आफूले उच्च शिक्षा हासिल नगरेकाले व्यापार व्यवसायबाट नै जिन्दगीमा यसरी कमाई  गरौला भन्ने लागेको थिएन’,उनले जानकारी दिए ।
    ‘अहिले मेरो छोरा काठमाडौंको भक्तपुरमा विज्ञान विषय लिएर पढ्छ । राकम कर्णालीमा वसोवास गर्दै आएका डिल बहादुरले भने, ‘पसलको कमाईबाट नै अरु बच्चालाई पनि पढाएको छु ।’
    ‘भारतका शहर र गल्लीमा मजदुरी काम गरी (बोझा) टाउको रौं नै खुइलिइका हुन्थे’ भारतमा पैसा कमाएको अनुभव सुनाए । खुइलिएको कपाल लिएर गाउँ फर्किंदा धेरैले कमाई धेरै भयो भनेर मेरैबारे कुरा काट्ने गरेको उनले बताए ।
    डिलवहादुर र नरवहादुरले व्यापारबाट गरेका उन्नति देखेर राकम कर्णालीका अन्य युवा विदेश जान छोडेर कोही तरकारी खेती त कोही व्यापार व्यवसायमा लागेको नरबहादुरले बताए । पहिले पैसा कमाउनको लागि नेपालमा कुनै काम छैन भन्नेहरुलाई नरबहादुर भने भारत नजान सल्लाह दिने गरेका छन् ।