मेहेलकुनामा सरकारी निकायको अन्तरक्रिया

सुर्खेतपत्र संवाददाता 

सुर्खेत, २३ असोज ।
    गाउँका जनताको शान्ति सुरक्षा, विकास निर्माण, सेवा प्रवाह लगायतका विषयमा बुझी समाधान गर्न सकिने समस्या तत्काल गर्ने र तत्काल समाधान गर्न नसकिने समस्यालाई सम्बन्धित निकायमा पहल गरी दिने उद्देश्यले मंगलवार मेहेलकुनामा सरकारी निकायको अन्तरक्रिया गरिएको छ ।

    प्रमुख जिल्ला अधिकारी पुरुषोत्तम कुँवरको नेतृत्वमा एक टोली मेहेलकुना गाविसमा पुगी अन्तरक्रिया गरिएको हो । कार्यक्रममा किसानहरुले समयमा मल वीऊ नपाएका, शिक्षामा भौतिक अवस्थाको कमी, मालपोतले जग्गा पास गर्न रोकेको, खानेपानी, विजुलीको समस्या, अस्पतालमा साधनहरु नभएको, विभिन्न सरकारी/सार्वजनिक कार्यालयहरुको पारदर्शिताका कुराहरु सहभागीहरुले उठाएका थिए । कार्यक्रममा सहायक प्रमुख जिल्ला अधिकारी अर्जुनकुमार शर्मा, प्रहरी उपरिक्षक गोविन्दराम परियार, सशस्त्र प्रहरी नायव उपरीक्षक अच्यूतकुमार मजगैंयालगायतको उपस्थिति थियो ।
    यता जिल्ला प्रशासन कार्यालय सुर्खेतले दसैं र तिहारको अवसर भन्दै विभिन्न संघसंस्थाहरुले चन्दा संकलन गरेको भन्ने पाइएकोले चन्दा नदिन निर्देशन दिएको छ । प्रशासनले मंगलवार सूचना जारी गरी जिल्लाको विभिन्न स्थानहरुमा चन्दा संकलन गरेको भन्ने बुझिन आएकोले त्यस्ता संघसंस्थाहरुलाई सहयोग नगर्न जनाएको छ ।