बिहे प्रस्ताव राख्दै हमालले यसरी सार्वजनिक गरे प्रेमिका

    राजेश हमालले पहिलो पटक प्रेमिका सार्वजनिक गर्ने कायक्र्ररम भएकाले पनि शंकर होटलको माहोल केही तातिएको थियो । हमालले प्रेमिकालाई कसरी सार्वजनिक गर्छन्, आखिर उनको विशेष कार्यक्रम कस्तो रहला भन्ने कौतुहलता सबैमा हुनु स्वभाविक नै हो । करिब आधा घण्टा  कुराएपछि बल्ल पत्रकारहरुलाई हमाल भएको कोठामा प्रवेश दिइयो । नायक राजेश हमालकी प्रेमिकाको तस्बीर सार्वजनिक भएपनि पहिलो पटक मिडियाले उनको आधिकारीक तस्बीर खिच्ने अवसर पाएको थियो ।
    शंकर होटलको एक कोठामा पत्रकारलाई प्रवेश दिएलगतै, माहोल निक्कै आकर्षक देखियो । बीचमा राखिएको हमालको आमावुवाको तस्बीर, फूलैफुलको सौन्दर्यता, वाइन पिउँदै गरेका हमाल दम्पत्ती सँच्चिकै माहोल आकर्षक थियो । वुझ्दै जाँदा थाहा भयो नायक राजेश हमालले नै यो माहोलको डिजाइन गरेका रहेछन् । मधु मौन थिइन्, हमाल केही लजालु देखिए । हमालले मधुलाई आफ्नी आमाले दिएको नेकलेस लगाइदिए । हातमा पनि आमाले बुहारीका लागि दिएको उपहार हमालले मधुलाई लगाइदिए । साँच्चै माहोल भावुक पनि बन्यो ।
    हमालले मधुलाई नेकलेस पहिराउँदै गर्दा गायक राजेशपायल राइले ‘द युगदेखि युगसम्म’ सिनेमाको ‘न कुनै बन्धन’ बोलको गीत गाए ।  सांगीतक माहोलमा हमालले मधुलाई भिन्न तबरले बिबाह प्रस्ताव राखेका थिए । राजेशले मधुसंग बिहे गर्ने मिति तय नभैसकेको जानकारी दिए । करिब ९ बर्षअघि हमाल र मधुको भेट भएको रहेछ । हायात होटलमा एक कार्यक्रमको सिलसिलामा मधु र हमालको भेट भएको थियो । हमालले मधुलाई आफ्नो भिजिटिङ कार्ड दिए । मधुले पनि केही दिनमै हमाललाई फोन गरिन् । यसपश्चात सुरु भएको थियो, दुई जनाको प्रेम यात्रा ।
    कार्यक्रममा मधुले भने केही पनि बोलिनन् । हमालले पनि मधुसाग भेट भएको दिन आफूहरुका लागि शुभ भएको बताए । मे २८ मा हमाल र मधुको भेट भएको रहेछ । यसैले उनीहरुले यो दिनमा रिसेप्सन राखेका
हुन् । ‘बिहे जेठ ९ या १० गते हुनसक्छ’ हमालले केही खुलाउँदै भने । बिहेमा आफ्ना रगतका नाता भएकाहरुलाई मात्र बोलाउने योजना राजेशको छ । मधु थोरै लजाइन् । पत्रकारले प्रेमलाई उमेरको अन्तरले पनि नछेक्ने रहेछ हैन भनेर सोधेको प्रश्नमा हमालले भने, ‘राजेश हमाल पनि कहिले बुढो हुन्छ र ?’ आजबाट बल्ल आफूले मधुको बारेमा बोल्ने अधिकार पाएको हमालको भनाइ थियो ।
    हमालको बोल्ने अधिकार छ हैन भन्ने प्रश्नमा मधुले टाउको हल्लाउँदै स्विकृती दिइन् । मे २८ मा रिसेप्सन दिएलगतै हमाल १५ दिनका लागि मधुलाई छोडेर अष्ट्रेलिया जाँदैछन् । ‘हनिमुन यसपश्चात मात्र,’ राजेशले
भने । हमालले आजको दिनमा आर्ना मातापितालाई सबैभन्दा धेरै मिस गरेको बताए । यो भनिरहँदा उनी केही भावुक बनेका थिए । राजेशले मधुलाई औपचारिक रुपमा प्रेम प्रस्ताव राखेका हुन् । हमालको प्रस्तावलाई मधुले टाउको मात्र हल्लाएर स्विकृती दिइन् । नेपाली सिनेमाका सुपरस्टार नायक राजेश हमालले प्रेममा परेको करिब ९ बर्षपछि पहिलो पटक प्रेमिका सार्वजनिक गरेका हुन् । यो क्षण साँच्चिकै उनी र उनका फ्यानहरुका लागि सुखद छ । (अनलाइन खबरबाट)