बलिउडमा बाघ र सिंहको भिडन्त

 

    बलिउड अभिनेता सलमान खान र विवेक ओबरायबीचको दुस्मनीको कुरा सबैसामु छर्लंगै छ । तर यी दुई बीचको टक्कर झनै मच्चिने भएको छ । बलिउड बक्स अफिसमा सलमान र विवेक बीच हुन लागेको भिडन्तले दुई नायकबीचको रक्साकस्सीलाई अझै बढाउने पक्का छ । यी दुइबीचको टक्करलाई फिल्मको नामले नै पुष्टि गरेको छ । सलमान खानले ‘एक था टाइटर’ नामको फिल्म खेलिरहेका बेला विवेकले ‘शेर’ नामको फिल्म गर्दैछन् । सलमान बाघ बन्दा विवेक सिंह बन्न खोजेपछि भिडन्त त हुने नै भयो नी ।

    बलिउड बक्स अफिसमा भविष्यमा हुने टाइगर र शेर बीचको भिडन्तको सम्भावित दृश्य बलिउड प्रेमीले दिमागमा सजाइसकेका छन् र उक्त भिडन्तमा कसले जित्ला ? भन्ने अनुमान पनि गर्न थालिसकेका छन् । अभिनेता विवेक भने युद्ध आफैंले जित्ने दाबी गर्दै भन्छन्, ‘सिंह बाघभन्दा ठूलो हुन्छ ।’ पछिल्ला दिनमा निकै नै व्यस्त बनेका विवेक सायद सोही व्यस्तताका कारणले होला बलिउडका सांच्चीकै सिंह मानिने सलमानलाई जित्ने सपना बुनिरहेका छन् । तर सलमान भने यसबारेमा केहीपनि बोलेका छैनन् । विवेक अहिले जिला गाजियाबाद, किस्मत, लव, पैसा, दिल्ली तथा कृष–३ लगायतका फिल्मको शुटिङमा व्यस्त छन् ।